Peneliti
1 tahun lalu · 26 view · 5 min baca · Cerpen 72120_59841.jpg
Foto: poskotanews.com

Jha' Atokaran

Sebuah percobaan menulis cerpen dengan bahasa Madura: 'Atokar' (Bertengkar)

E Settong bakto, sengkok mole dari sakolaan. Amarghana sengkok tak koat eghajak malolo sareng sakancaan. Se dimma settong sengkok todhus polana pangrasa. Pas ki’ etamba pole eghajak. Ya tamba laddhuk tang ate.

Tong settongnga oreng se ta’ ghelem tobu aghajak sengkok, ya sapa pole klamun banne Mat Kadir, na’ kanak mor lorong. Kanak jrowa klamun esoro co-ngoco oreng laen lakar tada’ ambuna. Se la daddhi korban co-cokocoanna na’ kanak jiya ta’ karo sengkok. Areya la banynyak. Ta’ kabitong orengnga.

Ya sengkok pola laen dari se laen. Sengkok na’ kanak se mun esengkol sakoni’ pas se nyengkol tak aromasa sala, esala’aghi pas ghi’ bhlaban. Ya tada’ laen jadiya salaen tokar raja pagghun. Ta’ kera nyorot sa tenggha’. Ta’ kera tak elabhan. Ta’ ejap sapa bhai aruwah,  pagghun eaddhepi. Pole karo Mat Kadir, kanak se ta’ perna bhender dari lamba’.

Teppa’na jam istirahat sakola, Mat Kadir esentare moso sengkok ka kantin sakola. Mat Kadir tak kasorang e bakto jadiya. Bada sakitar empa’ sampe lema oreng. Tape sengkok aromasa e jalan se ta’ lopot. Sengkok aromasa bendher.

Sengkok se la tak koat ngoso’, rassa apoy e dada, langsung ekoca’aghi ka Mat Kadir kalaban oca’ se bak seddheng.

“Ba’an reya Mat, mak acolo’ bini’. Ba’an mak tokang nyer-cer bhanta. Ta’ taoh aba’na sateya ngadebbhi sapa”, tang oca’ rassa kakeding bhak tengghi. Ta’ manglo aba’ la ta’ mekker lanjhang. Poko’ e tang pekker, Mat Kadir wajib menta sapora ka sengkok. Otaba jalan laen: Mat Kadir siap atokar ben sengkok.

Tang oca’ se abak sanga’ ta’ langsung ejawab moso Mat Kadir ben sakancaanna. Cora’ tapaghegghen. Takerjet. Tada’ ojhan tada’ ombha’. Bada apa Rakib langsung ca’ ngoca’ kasar kalaban dada tengghi, paleng pekkerra Mat Kadir ben sakancaanna.

“Bada apa ra, kib. Ba’na dapa’ ngoso’. Dante’ bada apa kellu?”, Latip, kancana Mat Kadir, se arespon lu-kellu coba’ macair suasana.

“Ba’an mun terro taoa, soro kancana asapora ka sengkok. Jadiya se tokang nyercer banta. Mat Kadir”.

Mat Kadir ta’ tarema ka oca’na sengkok. Kanak reya cora’ jhat angko. Ghi’ bangal acolok sarombanan kalaban oca’ se ta’ kala tengghi: “baan jha’ kor ngoso’. Sengkok lalake’. Benni reng bini’. Pateppa’ mun aoca’”.

Pada ta’ gheddi’, oca’na Mat Kadir elaban kalaban oca’ se pada ta’ kala tengghi.

“Ba’an ta’ osa banynyak bhanta. Sengkok ta’ buto pa-apa pole. La banynyak bhukte se ekataoe sengkok. Karo baan se acolo’ bini’ e sakola dinna’. Sakabbhina nak-kanak la tao oreng macem ba’an. Sateya ba’an ngako otaba atokar, pas pele. Ta’ buto sengkok ka bhanta laen se dua’ reya”.

Mat Kadir pagghun jhag-jhag. Ta’ aromasa sala. Ta’ aromasa parlo menta sapora ka sengkok. Epekker cora’ ta’ parlo abit, makle urusan reya lekas mare, esentare Mat Kadir kasemmaan. Kalaban isyarat kaangghuy se laen ta’ ro’-noro’ urusan reya, pale-eran kalambhina Mat Kadir etegghu’ so sengkok. Etare’ so sengkok. Epajhau dari meja ben korse Kantin kaangghuy ta’ aperreyan ka rang-bharang se laen lamon kadaddhiyan tokar.

Mat Kadir cora’ bada rassa todus ka se laen. Sabab ekenal angko e sakola, kanak reya rassa gengsi mun ta’ alaban. Ta’ emu-temmu e dhalem posisi ta siaga, sengkok arassae sake e leng-pelengan. Puh, Mat Kadir bhak santa’ pamokolla. Iya, sengkok pada takok todus, ta’ parlo abit langsung ebalas keya ben sengkok. Mat Kadir akalinjang mundur. Tang torkopan teppa’ e pepena se kiri. Pada bhak santa’. 1-1. Pekker sambi mesem.

Mat Kadir ki’ alebbiyan todhussa etembhang sake’ e pepena. Kanak reya maju kalaban torkopan se lopot e sisi kiri tang pepe. Sengkok cepet ngalle ka posisi kanan. Mat Kadir aberi’ pole serangan. Sengkok takerjet carana Mat Kadir aberi’ serangan. Arassa torkopan tanangnga Mat Kadir merre pole. Teppa’ e leng-pelengan se kanan. Kanak reya sajhat andi’ kamampuan silat. Pantessan kanak reya angko.

Eker-pekker sengkok kala soal teknik. Pokolna Mat Kadir alebbi banynyak katembhang sengkok. Berempa kale sengkok ecapo’ torkop. Arassa pusing, akalinjeng. Tape sengkok ki’ alebbiyan rassa todus etembhang sake’. Sengkok mulae ngangghuy jurus mabuk. Jurus tak jellas teknikka. Tape Mat Kadir cora’ tak siap ngadebbhi serangan jurus mabuk. Teknikka ta ajalan efektif. E posisi Mat Kadir nahan terros, sengkok terros maju aberi’ serangan. Akherra settong-dua’ merre keya tang pokolan. Mat Kadir kaelangan posisi manjheng se teppa’. Di-budina labu aganthang.

Sabellunna pokolan se pamongkas merre, Pak Guru Tofik langsung mesa sengkok dari Mat Kadir. Mat Kadir langsung ekarebbhungi sakancaanna. E sellana epesa, sengkok ben Mat Kadir kik pada saleng ngabas. Bak dhibi’ ki’ siap lanjut sakerana ta’ epesa Guru.

Tokar akherra mare. Bubhar kabbhi.

***

E roma, reng toa ben tatanggha langsung ngataoe berita e sakolaan. Nyama Mat Kadir ban Rakib langsung daddhi bhantana banynyak oreng. Banynyak se ngoca’ jhuba’ jha’ atokaran. Kanak ngoda mastena mabanynyak kanca. Reng atokaran tada’ kancana. Reng atokaran ta’ ekaleburi kanca.

Maske ta’ sabanynyak se ngoca’ jhuba’ atokaran, se ngoca’ ta’ rapa bada keya. Atokar ta’ rapa. Biyasa mun kanak ki’ ngoda. Bada keya se ngoca’, mun e posisi ta’ sala, nyurot ta’ alaban karo bakal eteddha’. Mangkana tada’ salana alaban.

Tape oreng toa lebbi acocokan ka pandapat se pertama. Eppa’ maenga’ kalaban cara se kerras. Socana mera. Rassana eppa’ lebbi pegghel tembhang emak. Eppa’ sampe’ ngoca’ mun atokar sakaleyanaghi, esoro ondhur. Ta’ sudi andhi’ anak karo tokang atokaran.

Saabiddha ekikiri eppak ben emmak, sengkok karo nondhu’. Mi’ badaah saoca’an, tada’ sakale. Iya, oreng toa ta’ lopot maenga’: atokar sajhat benni tengka se bendher. Atokaran ta’ alastareaghi masala. Sabaliggha, masala bisa tamba raja. Masala so Mat Kadir bisa mare kalaban atokar.

Saporana ki,  pak, pangoca’ dalam ate. Saporana se raja.

Eker pekker saterrossa ta’ daddhi apa mun lako atokaran. Jhuba’ ka tatanggha. Jhuba’ e lingkungan. Jhuba’ ahlak. Duh, ella. La ta’ tao beremmaan panilaian guru ka sengkok. Na’-kanak se ta’ toman atokaran reya pas atokar. Laen careta ben Mat Kadir, kanak se jhat ekenal tokang kaco.

E sakola, sengkok ben Mat Kadir epangghil. Epamanjhang e kantor sambi eberi’ patotor kaangghuy ajaga ahlak. Tada’ apana cerdas, penter, andhi’ elmo se banynyak bila ta andhi kasopanan ben tengka se teppa’. Patengghii elmona, lamun ta andhi’ ahlak, ta’ daddhi apa.

Samarena aberi’ pamator masala tengka, ahlak. Pak Kepala Sakola ngala dua rapor. Settong ebaghi ka Mat Kadir. Settongnga ka sengkok. Pa Kepala Sakola aberi’ isyarat kaangghuy ngabas langsung nilai rapor.

Langsung mata katojjhu ka nilai ahlak: olle nilai lema’. Duh. Mak jhuba’ tang nilai ahlak. Sakejjha’ alerek ka raporra Mat Kadir. Romassa takerjet tor bunga. Nilai ahlakka Mat Kadir ennol. Aleyas eangghap ta’ andhi’ ahlak pola. Ngalakkak mun ate. Keng etahan. Bada rassa neser ngabas Mat Kadir.

“Jha’ kobater. Oreng Madhura reya andhi’ ca-oca’an. Ahlak reya tamaso elmo sa tada’ tolessa. Raporra ba’an reya banni panilaian se utama. Ba’an dhibi’, lingkungan tatanggha ban masyarakat se bisa anilai saongghuna enga’ apa ahlak otaba tengkana ba’an. Nilai rapor bisa eoba kalaban bolpen. Tape tengka otaba ahlak kasaarena ba’an harus epateppa’ kalaban cara mateppa’ babataggha ba’an. Catet. Jha’ sampe kaloppae jadiya”.

Salastarena ecaramaeh, Mat Kadir ban sengkok pada saleng sapora.

Artikel Terkait